「黃絲」教人妨礙司法公正庇「手足」

■「黃圈」呢兩日又起內訌。 赴湯fb截圖

大鬧「黃店」交片篤灰暗示「搞佢」

教「同路人」講大話洗CCTV片

敢做唔敢認﹖咪係「黃圈」價值觀囉。話說呢兩日有人爆料，一間曾被「黃絲」捧喺手心嘅「黃店」，「竟然」主動向警方交咗CCTV片當證據，最終令「手足」被控。「黃絲」知道件事當然即刻群起狙擊、大鬧間「黃店」篤灰，話佢哋「累」咗「手足」前途，仲暗示會搵人「搞佢」。有人則爆話當時已經有人叫佢哋洗咗啲片，更叫其他「黃店」遇到同類事件要洗晒啲CCTV片，講大話話部CCTV當日壞咗等等去妨礙司法公正，充分反映「黃絲」係幾咁目無法紀。

舊年8月31日，大批暴徒包圍深水埗警署，向警署擲磚同埋用「鐳射槍」射向警員。警方當時拘捕咗14男4女，年齡最細13歲，當中2男1女當日已各被控一項參與暴動罪，其餘15人有13人「踢保」。警方徵詢律政司意見後，喺5月中旬拘捕其中嘅10男2女，連同保釋緊嘅1男1女，警方控告14人參與暴動及藏有攻擊性武器等罪名。

就係呢單case令「黃圈」掀起一陣內訌。有人爆出深水埗警署對面嘅「饗車仔麵」向警方提供CCTV片，等警方有證據告多十幾個「手足」。

提過要清片 翌日交畀警方

爆料人仲繪影繪聲咁講咗個「交片過程」，話「饗車仔麵」聲稱收到警方嘅搜查令，而呢件事區議員已證實，「但事發幾日內佢地（哋）話無左（咗）hdd（硬盤）交唔到片，亦有人提過佢地（哋）要清，當時收到答覆係清左（咗）。」

但係，「饗車仔麵」隔日就主動向警方交片，「而交片後亦未有作任何提醒，累多15位『手足』既（嘅）前途（最小13歲）。而同一條街六間舖得佢地（哋）一間交左（咗）片。」小記為此也有求證求真，但至截稿時，「饗車仔麵」都冇回應過件事。

「黃絲」不滿「黃店」冇包庇「手足」

消息一出，啲「黃絲」一窩蜂鬧間「黃店」篤灰，不滿間舖冇包庇「手足」。「Patrick Lee」稱：「有搜查令又點？你明知交片出去會連累咁多年輕人坐暴動監，咁你自（己）犧牲咗好過啦，唔交片都係妨礙公職人員罪姐（啫）！」「Lok Ka」仲爆料話：「個（嗰）日唔係無人提你del cctv，有warrant大×曬（晒）？機件故障得唔得呀？hdd唔小心入左（咗）水得唔得呀？」

「Kimmy Lam」更教人妨礙司法公正：「有手令都可以話cctv壞左（咗），亦可以話個（嗰）日無開。」「花戶滿月」亦稱，「人有好多唔小心，唔小心壞左（咗），唔小心無開機，唔小心記憶卡唔見左（咗），唔小心換個新。」

本住一言不合就係「藍」嘅作風，幾個黃藍地圖都將間舖轉為「藍店」，仲要將佢從「黃圈」所謂「（美國感恩節）11.26-11.29懲罰祭」中除名。攬炒派元朗區議員王伯羽更暗示叫人去「裝修」呢間店：「留名睇警犬保護鋪（舖）面。」

早前「黃絲」力撐 反面快過翻書

呢間「饗車仔麵」咪之前有「立場新聞」等幫手宣傳，《蘋果日報》仲有幫佢出報道，「黃絲」亦大讚佢哋啲嘢「物美價廉」。不過，一旦「黃店」唔啱「黃絲」心水，佢哋就反面仲快過翻書，好比今次佢哋就失咗憶。「黃絲」就開始話佢哋啲嘢難食、服務差，又篤灰佢哋曾經違反限聚令，好似攬炒派嘅荃灣區議員岑敖暉就鬧呢間店「好×難食」，仲話自己「以前成日笑佢唔係賣麵係賣烏蠅拍：因為佢日日都只能拍烏蠅……」所以呢，人一「黃」，為咗自己友咩違心嘢都講得出，反映咗佢哋平日所講嘅嘢有幾成真，真係「你懂的」！